මෙරිල් ගේ ආතල්

 

මෙරිල් ගේ ආතල් නිසා අප  අමාරුවේ වැටුනේ වරක් දෙවරක් නොවේ. මෙරිල් සමග සිටින්නෝ අවදානම් ගන්නෝය​. එහෙත් මෙරිල් කරන කියන වැඩ නිසා අපි නිතරම සිනාවෙන් සිටියෙමු. 

ඕපීඩී එකේ සිටින විට එක් ඇටෙන්ඩන්වරයෙක් නිතරම අතන රුදාව මෙතන රුදාව කියමින් බෙහෙත් ගැනීමට එන අතර ඕපීඩී වෛද්‍යවරුන්ට මොහුව මහත් ඇණයක් විය​. වරක් මොහු බෙහෙත් ගැනීමට ආවිට මෙරිල් මේ බෙහෙත ගන්න කියා Akapuran 20 mg bd යන බෙහෙත් තුන්ඩුව  දුන්නේය​. ඇටෙන්ඩන්වරයා ඩිස්පැන්සරියට බෙහෙත් තුණ්ඩුව ගෙන ගිය අතර ඩිස්පැන්සරියෙන් මේ බෙහෙත නැතැයි කීවේය​. එවිට ඔහු බෙහෙත් තුණ්ඩුව ගෙන පුද්ගලික ෆාමසි වලට ගිය මුත් කිසිවෙකු මේ අරුම පුදුම බෙහෙත ගැන දැන සිටියේ නැත​. අවසානයේදී මේ බෙහෙත් තුණ්ඩුව කියවූ මේල් නර්ස් කෙනෙක් ඇටෙන්ඩන්වරයාට බෙහෙතේ වග කීවෙන් ඉන් පසු ඔහු මෙරිල් ඉන්න පලාතකටවත් නාවේය​. 

ඕපීඩී එකේ සිටියදී සමහරක් විට විවිධ රෝහල් වලින් දොස්තරලා හෙදියෝ කතා කරති. " අනේ අපි දන්න කෙනෙක් දෙකේ වාට්ටුවට ඇතුළු උනා එයාගේ තත්වය බලලා කියන්න පුලුවන් ද ? කියා ඔවුන් අසති. එවිට අප වැඩ පාළු කරගෙන අදාල වාට්ටු වලට ඉන්ටර්කොම් දුරකථනයෙන් වාට්ටු වලට කතා කොට රෝගියාගේ තත්වය අසන්නෙමු. සමහර විට ඉන්ටර්කොම් එක වැඩ නොකරයි. එවිට අපට අදාල වාට්ටුවට යන්නට සිදු වෙයි.  මේ සඳහා වේලාව ගත වන නිසා මෙවැනි දුරකථන පණිවිඩ කරදරකාරී දුරකථන පණිවිඩ ලෙස අප සැලකුවෙමු. එහෙත් මෙරිල් මේ දුරකථන පණිවිඩ වලට නොසැලුනේය​. එවැනි ඇමතුමක් ඔහුට ආ විට අප මෙන් ඉන්ටර්කොම් දුරකථනයෙන් අදාල වාට්ටුවට කතා කොට විස්තර ගන්නවා වෙනුවට ඔහු මෙසේ කියයි. " අනේ මිස් ඒ ලෙඩා අද උදේ නැතිඋනා නේ" 

මෙරිල් මෙසේ වගක් විභාගයක් නොමැතිව ලෙඩුන් මරණ නිසා මම ඔහුට බැණ වැදුනෙමි. : "උඹ මාර වැඩනෙ කරන්නේ ; දැන් ඒ මිනිස්සු බොරුවට කලබල වෙයි "  

මෙරිල් ගේ උත්තරය සරලය ; ඉතින් උන්ට එච්චර ඇම්මක් ලෙඩා ගැන තියනවා නම් උන් අපිට වැඩ පවරන්නේ නැතිව උන්ම ඇවිත් ලෙඩා බැලුවනම් ඉවරනේ. 

ඔහුගේ පිලිතුරට මම නිරුත්තරය​. 

වරක් මාළු ලෙල්ලම පැත්තෙන් තඩි කළු මහත ගැහැනියක් බෙහෙත් ගැනීමට ආ අතර ඇය මෙරිල් වෙත ගොස් මගේ ඇඟ රිදෙනවා කීවාය​. මෙරිල් එතරම් වගක් නොගෙන " මොන ඇඟද ?  කියා ඇසුවේය​. මෙය ඇසූ මාගම චීත්තය තද කර ගනිමින් " මොන ... අහනවද මන්දා"   කියා බාහිර රෝගී අංශය දෙවනත් කිරීමට ගිය අතර වෙනත් වෛද්‍යවරයෙක් මැදිහත් වී    " ඒ මාතියාට ෂිංගල එච්චර තේරෙන්නේ නේ " කියා  දෙමල පාට් එකක් දමා  මාළු වෙලෙන්දියව සන්සුන් කලේය.