Saturday, December 15, 2018

ලංකාව විසින් මෙතෙක් බිහි කර තිබෙන විශිෂ්ටතම මනෝ විද්‍යාඥයා වන පද්මාල් ද සිල්වා


ලංකාව විසින් මෙතෙක් බිහි කර තිබෙන විශිෂ්ටතම මනෝ විද්‍යාඥයා පද්මාල් ද සිල්වා මහතාය. ඔහු මනෝ විද්‍යාඥ ස්ටැන්ලි රැක්මන් , මනෝ විද්‍යාඥ විලියම් යූල් වැනි පතාකයන් ගේ ගෞරවයට ලක් වූ පුද්ගලයෙකි. එහෙත් වරක් මා ඉදිරියේ එක් මනෝ වෛද්‍යවරියක් පද්මාල් ද සිල්වා මහතා උපහාසයට ලක් කලේ ඔහුගේ ප්‍රථම උපාධිය සිංහල සහ බෞද්ධ දර්ශනය බව කියමිනි.නමුත් ඇය නොදැන සිටි එක් කරුණක් නම් පද්මාල් ද සිල්වා මහතාව වඩාත් යහපත් මිනිසෙකු බවට පත් කලේ මේ සිංහල සහ බෞද්ධ දර්ශනය යන විශයන් බවයි. පද්මාල් ද සිල්වා ලංකාවට පැමිණි අවස්ථා වලදී මා හමු වීම සඳහා යුද හමුදා රෝහලටද පැමිණීමට පුරුදුව සිටියේය. රෝගීන් සඳහා මනෝ ප්‍රතිකාරයේදී එතුමා මට ගුරුහරුකම් ද දුන්නේය.

පද්මාල් යනු පේරාදෙනිය විසින් බිහි කරන ලද අන්තර්ජාතික කීර්තියට පත් වූ අතිජාත පුත්‍රයෙකි. ඔහු ඉතා යහ ගුණ ඇති මිනිසෙකි. මා වැනි කනිෂ්ඨ පුද්ගලයන්ට අත හිත දුන්නේය. මම පරියේෂණ පත්‍රිකා ලිවීම ඉගෙන ගත්තේ ඔහුගෙනි. ඔහු මට ගුරුවරයෙකු මෙන්ම පහන් ටැඹක් විය. ඔහුගේ අකල් මරණය විශාල පාඩුවකි. මා විසින් ලියන ලද PTSD Sri Lankan Experience පොත මා විසින් පුදන ලද්දේ ඔහුටය. ඔහු බටහිර දැණුම සහ පෙරදිග දැණුම අතර පාළමක් විය. පරළ වූ යකදුරෙකු මෙන් බටහිර විද්‍යාවට තිස් තුන් පැයේ බනින නලීන් ද සිල්වාට මඟ හැරුනේ මේ පාලමයි. පේරාදෙනිය විශ්ව විද්‍යාලය මුළු ලෝකයක් ගරු කල ලංකාව විසින් මෙතෙක් බිහි කර තිබෙන විශිෂ්ටතම මනෝ විද්‍යාඥයාට මීට වඩා බුහුමනක් කළ යුතුය.

වෛද්‍ය රුවන් එම් ජයතුංග 

Wednesday, December 12, 2018

ඇනෝ ගැසූ බුවා නලීන් රොහාන් කුලතුංග අතේ කෝට්

 
බ්ලොග් වල ඇනොනිමස් ලෙස හෝ බොරු අයි.ඩී වලින් ඇවිත් කමෙන්ට් දැමීම සුලබය​. එහෙත් සමහර පුද්ගලයෝ  ඇනොනිමස් සහ බොරු අයි.ඩී වලින් පැමින කුපාඩි කතා , අසභ්‍ය කතා සහ තර්ජන කරති. මෙවැනි පුද්ගලයෝ යම් ආකාරයක මානසික අසමබරතාවන් පෙන්වති. ඔවුන් තුල හීනමානතා සංකීර්ණය​,  අනාරක්‍ෂිත බව , අවිඥාණික ලිංගික ගැටළු සහ තමන් කෙරෙහි අඩු ආත්ම සම්මානය  තිබෙන බව   පෙනී යයි. 

බොහෝ බ්ලොග්කරුවෝ මෙවැනි අසහනකාරයන් ගේ ප්‍රහාරයන්ට ලක් වෙති. මොවුන් තමන් ගේ අනන්‍යතාව සඟවා ගැනීමෙන් යම් ආකාරයක වින්දනයක් ලබති. එහෙත් ඔවුන් ගේ අනන්‍යතාව එක්ස්පෝස් කල විගස ඔවුන් මානසිකව කඩා වැටෙති.  

දිවංගත විචා තුමා හෙවත් විචාරක ( මේජර්  ගුණරත්න )  බ්ලොග් වල පාහර කොමෙන්ට් දමන ඇනෝලාව අසු කර ගන්නා ආකාරය පිලිබඳව මට ක්‍රමයක් කියා දුන්නේය​. එම ක්‍රමය භාවිතා කොට මම වර්චස් ඇනෝලා අල්ලා ගත්තෙමි. ඔවුන් ගෙන් බොහෝ දෙනෙකු හාල් කෑලි වූ නමුදු වරක් බ්ලොග් ලියන පතාකයෙක්ද මට අතටම අසු විය​.  

පසුගිය කාලයේ විවිධ ඇනෝ නම් වලින් සහ බොරු අයි.ඩී වලින් Rohan Ariyarathna ,  RoshAri , Unknown, Wijebahu යන නම් භාවිතයෙන් එක් පුද්ගලයෙකු මාගේ ට්‍රාන්සිල්වේනියා බ්ලොගයට විත් පහරා ගියේය​. තවද ඔහු මට තර්ජනද කල අතර විනිට්සා වෛද්‍ය පීඨයේ හිටපු සිසු සිසුවියන් ගේ නම් භාවිතා කරමින් කොමෙන්ට් දැමුවේය​. 

අවසානයේදී මම විචා තුමා විසින් මට කියා දුන් හබක ඇටවූයෙමි. බොරු අයි.ඩී කාරයා අතේ කෝට් විය​.  ඔහු නමින් නලීන් රොහාන් කුලතුංග. ජීවත් වන්නේ ඕස්ට්‍රේලියාවේය​. ඔහුගේ ඡායාරූපය මෙහි දැක්වේ. 

පසු සටහන ; රොහාන් දැන් ඉතින් ඇනෝ ගැහුවා ඇතිය​. ඔබගේ සරම බිමය​. තවත් ඇනෝ සෙල්ලම කලහොත් බොරු ඊමේල් අයි. ඩී සාදගෙන බිරිඳට හොරෙන් කල මංගල කිංකිණි කේස් ,විනිට්සා සමාජිකයන්ට පද හදපුවා ආදිය අනුජාට දන්වනු ලැබේ. තවද ඔබගේ තර්ජනාත්මක පණිවිඩ වල අයි. පී අංකයන් ද මා සතුව තිබේ. ඒ නිසා දැන් යහපත් වන්න , සන්සුන් වන්න බවුන් වඩන්න​.

Sunday, December 9, 2018

නලීන් ද සිල්වා , ගුණදාස අමරසේකර සහ ගණනාථ ඔබේසේකර


 නලීන් ද සිල්වා  සහ  ගුණදාස අමරසේකර යනු බටහිර ලෝකය සියළු  අයහපතේ මූලය ලෙස සිතන්නෝය. ඔවුන්ට බටහිර අජීර්ණය. එහෙත් ඔවුන් තම දරුවන් උසස් අධ්‍යාපනය සඳහාද ජීවත් වීම සඳහාද යැව්වේ බටහිරටය.  

ගුණදාස අමරසේකර යනු ශ්‍රී ලංකාව නම් කුඩා දිවයිනට පමණක් සීමාවූ හිටපු දන්ත වෛද්‍යවරයෙකි. ඔහු ගැන අනුරාධපුරයෙන් එහාට මිනිසුන් දන්නේ නැති තරම් ය. නලීන් ද සිල්වා  උසස් අධ්‍යාපනය ලබන්නේ බටහිරය.  ඔහුට බටහිර රටක විශ්ව විද්‍යාලයක තනතුරක් අවශ්‍යව තිබුණි. එහෙත් ඔහුට බටහිර ලෝකයේ තැනක් ලැබෙන්නේ නැත. ඔහුගේ බටහිර විරෝධයේ ආරම්භය එතැනය.එහෙත් ගණනාථ ඔබේසේකර යනු  බටහිර ලෝකයේ ගරුත්වයට පාත්වූ ධීමතෙකි. ඔහු නලීන් ද සිල්වා  සහ  ගුණදාස අමරසේකර  මෙන් ජෝකර් කෙනෙකු නොවේ. 

ප්‍රිංස්ටන් විශ්ව විද්‍යලයේ  මහාචාර්‍ය ගණනාථ ඔබේසේකර අන්තර් ජාතික කීර්තියට පත්වූ උගතෙකි.  ගණනාථ ඔබේසේකර පිලිබඳව එංගලන්තයේ , ඇමරිකාවේ , කැනඩාවේ මෙන්ම ප්‍රංශයේ සිටින මා හඳුනන මනෝ විද්වතුන් අදහස් පළ කොට ඇත. උදාහරණ ලෙස එංගලන්තයේ ආචාර්‍ය ස්ටීවන් හීත්, ඇමරිකාවේ  ආචාර්‍ය රොජර් බෘක් ,  කැනඩාවේ මහාචාර්‍ය රිචඩ් ලේලොන්ඩ් , කැනඩාවේ වෛද්‍ය එරික් ස්මඩ්ජා යන්නවුන් මා සමග ගණනාථ ඔබේසේකර  ගේ කෘතීන් ගැන කතා කොට තිබේ. එහෙත්  ගුණදාස අමරසේකර පිලිබඳව මා සමග කතා කොට ඇත්තේ දිවයින පුවත්පතේ පාඨකයන්‍ ය.  නලීන් ද සිල්වා පිලිබඳව මා සමග කතා කොට ඇත්තේ විදුසර පුවත් පතේ පාඨකයන් ය. 

අවාසනාවකට මෙන් ගනනාථ ගේ කීර්තිය නලීන් ද සිල්වාට නැත. නලීන් ද සිල්වා පිලිබඳව බටහිර ලෝකය දන්නේ නැති තරම් ය. නමුත් නලීන් ද සිල්වා සිතන්නේ  බටහිර ලෝකයට ඔහු බින් ලාඩ්න් කෙනෙකු කියාය. නලීන් ද සිල්වා ජීවත් වන්නේ ඔහු විසින්ම සදාගත් මනංකල්පිත විශ්වයකය. ඒ අතින් ගුණදාස අමරසේකර පොළවේ පය ගසාගෙන සිටින්නෙකි. එහෙත් ඔහු තදින්ම කුමන්ත්‍රණ න්‍යාය විශ්වාස කරන්නෙකි. මේ ත්‍රිත්වයෙන් ලංකාවට වටින්නේ ගණනාථ ඔබේසේකර ය. අනෙක් දෙදෙනා ඉතිහාසයේ කුණු කූඩයට යාමට නියමිතය. 


වෛද්‍ය රුවන් එම් ජයතුංග

Friday, December 7, 2018

කාඩියෝලොජිස්ට්

 

මෑතකදී ටොරොන්ටෝහි ශ්‍රී ලාංකිකයන් විසින් සංවිධානය කරන ලද නත්තල් උත්සවයක් තිබුනේය. එම උත්සවයේදී මට හිටපු පොලිස් නිලධාරියෙකු  මුණ ගැසුනි. අප කතා කරමින් සිටින විට එම හිටපු පොලිස් නිලධාරියා උත්සවයේ සිටි කාන්තාවක් පෙන්වා  " අර ලේඩි කාඩියෝලොජිස්ට් කෙනෙක් කියා කීවේය.  ඇයව මට එක වරම හඳුනා ගත හැකි නොවීය. එහෙත් මගේ මතකය තවමත් මලානික නැත. මේ කාන්තාව මට දැක පුරුදුය. 

මගේ මතකය දශක කීපයක් පසුපසට ගියේය. ඇය විශාකා විද්‍යාලයේ ඉගෙනුම ලබා පසුව සෝවියට් දේශයේ දනියෙස්ක් නගරයේ වෛද්‍ය පීඨයෙන් වෛද්‍ය උපාධිය ලබා ලංකාවේ කාඩියෝලොජි යුනිට් එකේ සේවය කල බව මට මතක් විය. ඇය MO කාඩියෝලොජි හෙවත් කාඩියෝලොජි යුනිට් එකේ සේවය කල සාමාන්‍ය වෛද්‍යවරියකි. කාඩියෝලොජිස්ට් කෙනෙකු නොවේ. පසු කාලයක මේ කාන්තාව කැනඩාවට ආවාය.  ඇය තමා  ලංකාවේ මෙන්ම කැනඩාවේද කාඩියෝලොජිස්ට් කෙනෙකු ලෙස කැනඩා ශ්‍රී ලාංකික ප්‍රජාව ඉදිරියේ තමාව හඳුන්වා දී තිබුනාය.

2010 වසරේ මම සෙනෙකා කිං කැම්පස් හි මහාචාර්‍ය එලෙනා ගෝල්ඩ් ලීමාන් යටතේ ජීරියැට්‍රික්ස් (වෘද්ධචිකිත්සාව) සහ උපදේශනය හැදෑරුවෙමි. එහිදී අපට ස්ථාපනය (Placement ) සඳහා ටොරොන්ටෝහි වයස්ගතවූවන් බලා ගන්නා ආයතන වලට යාමට නියමිත විය. මා ගිය ආයතනයේ මේ කාන්තාව PSW හෙවත් ඇටෙන්ඩන්වරියක් ලෙස සේවය කලාය. ඒ කාලයේදී ඇය මාව මග ඇරියාය. 

පොලිස් නිලධාරියාගේ හඳුන්වාදීමෙන් පසු මා  සිතුවේ ඇය දැන් විභාග සමත්වී කැනඩාවේ කාඩියෝලොජිස්ට් කෙනෙකු ලෙස සේවය කරනවා කියාය. එහෙත් ඇයගේ නම කැනඩාවේ කිසිම ප්‍රොෆෙශනල් ඇසෝසියේශන් එකක නොමැත. මේ කාන්තාව ශ්‍රී ලාංකික ප්‍රජාව අන්දන බව මට වැටහුණි. 

මේ සටහන ලියන මමද සියයට සියයක් සත්‍යවාදී පුද්ගලයෙකු නොවෙමි. පාසල් කාලයේදී  සමහර විට මම ගෙදර වැඩ නොකර බොරු කියා  ගුරුවරුන් ගෙන් ශේප් වී තිබේ. ගැටයා කාලේදී ගෙදරට බොරු කියා එම්පයර් එකේ සැවෝයි එකේ ෆිල්ම්ස් වලට ගොස් තිබේ. මෑතකදීද හිම වැටුණු අවස්ථාවක බොරුවට කොන්දේ කැක්කුම කියා ඩ්‍රයිව් වේ එකේ හිම සුද්ද කිරීම කොළුවා මත පවරා ශේප් වූයෙමි. එහෙත් මේ වර්ගයේ ප්‍රොෆෙශනල් බොරු කීම මට අපහසුය​. එවැනි බොරු අපි කී විට අතේ කෝට් වෙයි. කටේ තොලේ නොගෑවී ලොකු බොරු කීම ලොකු දක්‍ෂතාවයකි. 

රැකියාවෙන් කෙනෙකු උසස් හෝ පහත් වන්නේ නැත. මෙය උසස් හෝ පහත් රැකියා පිලිබඳ කතාවක් නොවේ. එම නිසා මෙම කතාව වැරදි ආකාරයට ග්‍රහණය නොකරගන්න. මෙය සත්‍ය සහ අසත්‍ය පිලිබඳ කතාවක්ද නොවේ. මෙය බොරුවක් ඉතා දක්‍ෂ ලෙස කියන්නේ කෙසේද කියා පෙන්වන කතාවකි.  කිසි බියක් සැකක් නොමැතිව තමා ලංකාවේ හිටපු කාඩියෝලොජිස්ට් කෙනෙක් සහ කැනඩාවේද කාඩියෝලොජිස්ට් කෙනෙකු බව කියමින් බේගල් අත ඇරීම සුළු පටු ක්‍රියාවක් නොවේ. ඒ සඳහා ඉතා දක්‍ෂ ආත්ම විශ්වාසයක් තිබිය යුතුය. වෙනකක් තබා පොලිස් මූලස්ථානයේ සේවය කල හිටපු පොලිස් නිලධාරියෙකු පවා ඇන්දී යන ලෙස බොරු කිව හැක්කේ කාටද ?. මා ඇයව විවේචනය නොකරමි. හෙලා නොදකිමි.  ඇය සැබවින්ම දක්‍ෂ කාන්තාවකි. 

වෛද්‍ය රුවන් එම් ජයතුංග



Thursday, December 6, 2018

සෙක්‍ෂුවල් හීලිංස්



.......පාදශ්‍රය බලය වටා ගොඩනැගිලා තිබෙනවා. බලය පෙන්වීම තුල අවිඥානික  ප්‍රදර්ශන කාමයේ ලේශමාත්‍රයන් සනිටුහන් වෙලා තිබෙනවා. මට මතක් වෙනවා පැරණි පන්සලක් බැලීමට ගිය අවස්ථාව​. අපි පන්සලේ පැරණි බිතු සිතුවම් අගය කරමින් එහි වූ චිත්‍ර පිලිබඳව කථා කරමින් හිටියේ. මා සමග ඇම්ස්ටර්ඩෑම් විශ්ව විද්‍යලයේ බෙනී ඔහුගේ සහකාරිය හැනා හිටියා.හැනා ෆ්‍රෙස්කෝ බිතු සිතුවම් ගැන උනන්දු වෙනවා.  ඇය අජන්තාවේ මෙන්ම සෙන්ට් ජෙනාරෝහි පැරණි බිතු සිතුවම්  පිලිබඳව ගැඹුරින් හදාරලා තියනවා.

අපි පන්සල් බිත්තියේ එක පැරණි සිත්තමක් ගැන කතා කර කර ඉන්න විට පන්සලේ වැඩ කරන කාල වර්ණ මිටි තරුණයෙක් අප වෙත කඩා පැන්නා. "මේවා  පොටෝ ගහන්න තහනම්" ඔහු අමුතු අධිකාරී බලයක් තමා වටා ආරූඪ කරගෙන​. ඔහුගේ දෙනෙත් යොමු වී තිබෙන්නේ හැනාගේ පළල් වූ කර සහ සළුවට වැසී තිබෙන පයෝදර වෙතට. ඔහුගේ දෙනෙත් වලින් මා දුටුවේ ලිංගික අසහනයට පත් වීම නිසා තමා සමග තිබෙන තරහ ඒ වගේම  අවට සතුටින් සිටින්නන් වෙත තිබෙන වයිරය​. පරණ පන්සලකට කොටු වෙලා තමාගේ ජීව විද්‍යාත්මක ආශයන් සන්තෘප්ත කර ගත නොහැකියාවේ  අතුරු එල​.

අපි කිසිවෙකු අත කැමරාවක් නැහැ​. "පන්සලකට එනකොට සංවරව ඇඳගෙන එන්න ඕනේ " ඔහු හැනාගේ  ශරීරය දෙස ගිජුව බලමින් කියනවා. මට හිතුනේ පන්සලේ බිතු සිතුවම් වල සිටි දිව්‍යාංගනාවන්ටත් ආදර්ශයක් හැටියට  හැනා ශරීරය වැසුනු  ඇඳුමක් ඇඳගෙනයි හිටියේ. නමුත් කාළගෝලයා යටි හිතෙන් අපේක්ශා කරනවා පන්සලේ බිතු සිතුවම් වල ඇඳ සිටි දිව්‍යාංගනාවන් වගේ හැනාත් අඩ නිර්වස්ත්‍ර වේවා කියලා. සදාචාරය තුලින් ඔහු අභ්‍යන්තරයේ සිටින කාමුකයා යටපත් කිරීමේ අසාර්ථක උත්සහයක නිරත වෙනවා.

සෙක්ස් යන වචනය ගූගල් අන්තර්ජාල සෙවුම් යන්ත්රය හරහා වැඩිම වාර ගණනක් සොයා ඇති රටවල් අතරින් ශ්රි ලංකාව  ප්රථම ස්ථානයට පත් වීම ගැන මම පුදුම වෙන්නේ නෑ. ලංකාව තුල බලවත් ලෙස ලිංගික අසහනය පවතිනවා. ඒක තමයි විශ්ව විද්යාල ප්රචණ්ඩත්වය , සමාජ ප්රචණ්ඩත්වය , බස් වල ලිංගික හිංසනය , සේවා ස්ථාන වල ලිංගික හිංසනය , පාසල් වල පර පීඩක ගුරුවරු මතුවීම යනාදී වශයෙන් හිස ඔසවන්නේ. ලංකාව තුල ලිංගිකත්වය පවතින්නේ හිංසන මාධ්යක් ලෙස​. ලාංකිකයාට ලිංගිකත්වය යනු හොරෙන් කලයුතු  දෙයක්. එහි ආදරයක් සෙනහසක් ඇල්මක් ,    ආත්මීය බවක් , හිතයිශී බවක් නෑ.  ඉතා ආත්මාර්තකාමි ලෙස තමයි ලාංකිකයා ලිංගිකත්වය ග්රහනය කර ගන්නේ. එතන මූලික වශයෙන් තියෙන්නේ තමන් සන්තර්පණය වීම​. බලන්න ජපානය , බ්රසීලය , තායිලන්තය වගේ රටවල ලිංගිකත්වය සමග එන උච්ච සංස්කෘතියක් තිබෙනවා. ලංකාවේ එවැනි   උච්ච සංස්කෘතියක් නෑ. ලංකාවේ සදාචාරාත්මක මිනුම විපරීතයි. ලිංගික වශයෙන් සක්රිය මිනිසා අශික්ෂිතයි. කප්පාදු කල මිනිසා සදාචාරමත්. මේක තමයි ලාංකික සදාචාරාත්මක මිනුම් දණ්ඩ. මේ ටේ ලිංගික කුහක බව පිරී ඉතිරී යනවා. සිප ගන්න දර්ශනයට කොටු කොටු දාලා පිහියෙන් අනින දර්ශනය රවුම් කරලා පෙන්වන සමාජයක් මේක.

" ලිංගික අසහනයවින්සන්ට් ලංකාතිලක ප්රතිරාවය කලේය. ඔහුට ගායක මාවින් ගේ විසින් ගයන සෙක්ෂුවල් හීලිංස් ගීතය පසුබිමෙන් ඇසුනේය. එය ශ්රවණ මායාවක්ද ? නැත. එය මාවින් ගේ විසින් ගයන සෙක්ෂුවල් හීලිංස් ගීතයයි. පියා විසින් වෙඩි තබා මරා දමන ලද මාවින් ගේ නැවත ඉපදීවත්ද ? එය සිදු විය නොහැකි දෙයකි. මිය ගිය මාවින් ගේ හට යළි පැමිණිය නොහැක. නමුත් ඔහු ඉතා සුමධුර ලෙස සෙක්ෂුවල් හීලිංස් ගීතය ගායනා කරයි. වින්සන්ට් ලංකාතිලකට පැටලිලි ස්වභාවයක් දැනුනේය

  වින්සන්ට් ලංකාතිලකඑකවරම   නැගිට්ටේ‍ය​.

" මහත්වරුනි මට සමාව අයදිනවා , මම හිතනවා අපට යාමට වේලාව හරි  කියා. ඉක්බිති ඔහු සියල්ලන්ටම අතට අත දුන්නේය​.

(පරිකල්පනික අතික්‍රමණය  වෛද්ය රුවන් එම් ජයතුංග)

Tuesday, December 4, 2018

1971 කැරැල්ල කෘතිය පිළිබඳ කෙටි සටහනක්




1971 වසරේ, අප්‍රේල් මස ජනතා විමුක්ති පෙරමුණේ මෙහෙයවීම යටතේ ලංකාවේ දකුණු පළාත මුල් කරගෙන දියත් කෙරුණු, රාජ්‍ය විරෝධී ආයුධ සන්නද්ධ තරුණ කැරැල්ල ශ්‍රි ලංකාව 1948 නිදහස ලැබීමෙන් පසු රට තුළ ඇතිවූ ප්‍රථම දේශපාලන අර්බුදය සනිටුහන් කළේය. දින ගණනාවක් තිස්සේ සිදුවු ප්‍රචන්ඩ ක්‍රියා රටතුළ හදිසි තත්වයක්, දේශපාලන අස්ථාවරභාවයක් හා සමාජ ආර්ථික වශයෙන් වියවුල් බවක් ඇති කිරීමට සමත් විය. 

මෙම තරුණ නැගිටීම අහඔු සිදු වීමක් නොවුයේ ඊට පසුබිම දශක දෙකක පමණ කාලයක් තුළ නිර්මාණය වූ නිසාය. තරුණයින් මෙම ප්‍රචන්ඩකාරී කැරැල්ලට යොමු කිරීමට හේතු සාධක වූ කරුණු පිළිබඳව පැවති රජයේ අවදානයට යොමු වූ අතර යම් යම් ප්‍රතිපත්තීමය ප්‍රතිචාරයන් රාජ්‍ය පාර්ෂවයෙන් ඉදිරි වසර කිහිපය තුළ දැක ගත හැකි විය. කැරැල්ල ආයුධ සන්නද්ධ රාජ්‍ය විරෝධී තරුණ නැගිටීමක් වූ බැවින් වහා නිතිමය හා ආරක්ෂක පියවර ගත් අතර, සැලකිව යුතු තරුණ පිරිසකගේ ජීවිත හානි ඉතා කෙටි කාලයකින් සිදුවූ අතර, සම්බන්ද වූ පිරිස අත් අඩංගුවට ගැනීම හා නිතිමය පියවර ඒ අය සඳහා ගැනීමද වේගවත්ව සිදු විය. එහි ප්‍රතිඵලයක් ලෙස, සෘජුවම සම්බන්ද බොහෝ පිරිසක් සඳහා සිර දඩුවම් නියම කෙරිණ. බොහෝ අය පුනරුත්ථාපන ක්‍රියාවලියක් තුළින් නැවත සමාජගත කරණු ලැබීය. සිරගෙට නියම වූ පිරිස වසර හතකට පසු පොදු සමාවක් යටතේ නිදහස් කරනු ලැබීය.

ඉහත සඳහන් රාජ්‍ය විරෝධී තරුණ කැරැල්ල, මෙරට පසුව සිදුවූ ප්‍රචන්ඩ ක්‍රියාවල ආරම්භයක් සනිටුහන් කළේය. මන්ද, ඉදිරි දශක කිහිපයම රටතුල 1971 කැරැල්ලටත් වඩා බිහිසුණු දේශපාලන ප්‍රචණ්ඩත්වයක් නිර්මාණය වීමක් දැකිය හැකිව ඇති නිසාය. මේ සියල්ල 1980 දශකයේ මුල් කාලයේ ආරම්භ වූ උතුරු නැගෙනහිර මුල් කොටගත් ජනවාර්ගික යුද්ධය රටේ ආනාගතය කෙරෙහි දැඩිලෙසම බලපෑ සිවිල් ගැටුම වූ අතර, එහි බලපෑම අදටත් පැහැදිලිව දුෂ්‍යමාන වේ. මේ සියළු කැරලි හා යුධමය තත්වයන් කෙරෙහි බලපෑ පොදු සාධක හදුනා ගැනීම මෑත ඉතිහාසය දෙස සුපරික්ෂාකාරීව බලනවිට අපහසු නොවන අතර ඒවාට බලපෑ සුවිශේෂ තත්වයන්ද හදුනාගත ගැනීම අපහසු නොවේ. 

1971 කැරැල්ල සුවිශේෂිව සලකා බලනවිට, ඒ පිළිබඳව මේ වන විට සැලකිය යුතු ලිඛිත සාහිත්‍යයක් දැකිය හැකිය. රුවන් ජයතුංග විසින් රචිත මෙම ග්‍රන්ථය ඊට එක්කළ තවත් සැලකිය යුතු ප්‍රකාශනයක් වන අතර, 1971 කැරැල්ල පිළබඳව පාඨකයාට ඒ මගින් සැලකිය යුතු අවබෝධයක් ලබා දෙනවාට සැක නැත.

මෙම ග්‍රන්ථයේ සුවිශේෂත්වය වන්නේ, කැරැල්ලට සම්බන්ද සැලකිව යුතු නායකයින් රැසක්ද සමග කරන ලඳ සම්මුඛ සාකච්ඡා එකතුවක් ඊට ඇතුළු කර තිබීමය. මේ ප්‍රත්‍යෙකයන් ඉතා සවිස්තරාත්මක තොරතුරු පාඨකයාට ලබා දෙන අතර,ඒ මගින් 1971 කැරැල්ල පිළිබඳව යම් යම් ගැඔුරු තොරතුරු රැසක් ඒක රාශී කර ඇත. මෙම ප්‍රත්‍යෙකයන් පිළිබඳ පුළුල් විග්‍රහයක් ග්‍රන්ථයේ ඇතුළත් නොවූවත්, උනන්දුවක් දක්වන පාඨකයාට ඒ සඳහා අවස්ථාව කතුවරයා විසින් ලබා දී ඇත.

තරුණ කැරලි, ප්‍රචණ්ඩකාරී තරුණ නැගිටීම් ආදිය පිළිබඳව රටතුල පවතින සමාජ හා දේශපාලන කථිකාවන් විවිධය. ඒ විවිධත්වය සඳහා බලපාන සාධක අතර, දේශපාලන මතවාදයන් ප්‍රධාන වශයෙන් වැදගත් වූවත්, මෙම සංසිද්ධිය පිළිබඳව විවිධ පුද්ගලයින් හා කණ්ඩායම් දරණ මතය කෙරෙහි සමාජ කථීකාවන්ද ඉතා වැදගත් වේ. මෙම සමාජ කථිකාවන් පෝෂණය විය යුත්තේ, හුදු පුද්ගල නිශ්චිත අදහස් මත නොවිය යුතු අතර, ඒ සඳහා තරුණ කැරලි හා ප්‍රචණ්ඩත්වයට බලපාන සමාජ, ආර්ථික හා සංස්කෘතික සාධක පිළිබඳව කෙරෙන බෙහෙවින් අපක්ෂපාති හා වාස්ථවික විග්‍රහයන් ඉතා වැදගත් වේ. 

සවිස්තරාත්මක තොරතුරු ඇතුළත් රුවන් ජයතුංගගේ ප්‍රකාශනය මෙහිදී වැදගත් වේ. සටහන අවසන් කිරීම සදහාත්, පාඨකයාගේ කුතුහලය ඇවිස්සීම සදහාත්, යමක් කිය යුතුය. මෙම ග්‍රන්ථයේ විස්තර සපයන පුද්ගලයින් විශාල පිරිසක් දෙස බලන විට, පසු කාලීනව ඔවුන් සමාජයේ විවිධ ක්‍ෂෙත්‍ර වලට අවතිර්ණ වී කටයුතු කළ හා කරන බව මෙරට බොහෝ අය දන්නා සත්‍යයකි. මෙයින් ඇතැමුන්, සමාජයේ ඉතාම ප්‍රභූත්වයට පත් විය. මෙම තරුණ කැරලි පිළිබඳව උනන්දුවක් දක්වන සෑම කෙනෙක්ගේම අවදානය යොමු වි යුතු වැදගත් සංසිද්ධියකි. පසුව සිදුූ වූ තරුණ ගැටුම් පිළිබඳ අපගේ අත්දැකීම් 1971 කැරැල්ලට වඩා බෙහෙවින් වෙනස් වූයේ, ඒවායේ ස්වරූපය වෙනස්වීම පමණක් නිසා නොව, ඒවා කෙරෙහි බලධාරීන් දක්වූ ප්‍රතිචාරයේ ස්භාවය නිසා බවද සඳහන් කළ යුතුය.

මහාචාර්ය සිරි හෙට්ටිගේ
සමාජ විද්‍යාව පිළිබද සම්මානිත මහාචාර්ය
කොළඹ විශ්ව විද්‍යාලය

Find Us On Facebook