ක්ලින්ටන්ට කැනියුලා දැමීම​

 

2004 ආසියානු සුනාමියෙන් පසු ඇමරිකානු ජනාධිපතිවරෙයෙකු වූ බිල් ක්ලින්ටන් සුනාමි ව්‍යසනයෙන් හානියට පත් වූ ප්‍රදේශ නිරීක්‍ෂනය කිරීම සඳහා ශ්‍රී ලංකාවට ආවේය​. ජනාධිපති ක්ලින්ටන් ගේ චාරිකා සඳහා ගුවන් හමුදාව විසින් හෙලිකොප්ටරයක් ලබා දී තිබූ අතර යුද හමුදාවේ වෛද්‍ය බළකායේ වෛද්‍යවරයෙක් සහ හෙද කණ්ඩායමක් ක්ලින්ටන් සමග යවනු ලැබීය​. මෙම කණ්ඩායමට මා වැඩ කල වාට්ටුවේ හෙද නිලධාරියෙකුද තෝරාගනු ලැබීය​. 

සාජන්වරයෙකු වූ ඔහු එයා බෝන් පදක්කමක්ද ලබා තිබුනේය​. මෙම එයා බෝන් පදක්කම ලැබෙනුයේ නිශ්චිත පැරශූට් පිනුම් කිහිපයක් නිවැරදිව කිරීමෙන් පසුවය​. 

ක්ලින්ටන් සමග චාරිකාවට තෝරාගෙන තිබූ මෙම සාජන්වරයා ගමන යාමට පෙර දින මා හමුවට ආවේය​. 

" සර් මාර වැඩේනේ මට ක්ලින්ටන් එක්ක මාතර යන්න වෙලානේ " ඔහු කීවේය​. 

" ඉතිං කොච්චර හොඳද ඇමරිකන් ජනාධිපති කෙනෙක් එක්ක හෙලිකොප්ටරේ යන්න ලැබෙන එක " මම ඔහුට පිළිතුරු දුන්නෙමි. 

"ඒකනම් එහෙම තමයි සර් , ඒත් මොකක් හරි මෙඩිකල් ඉමර්ජන්සියක් උනොත් ?

" මෙඩිකල් ඉමර්ජන්සියක් උනොත් ටීම් එකක් ඉන්නවනේ ඔක්කොම එකතුවෙලා ක්ලින්ටන්ට ප්‍රතිකාර කරන්න " මම සැහැල්ලුවෙන් කීවෙමි. 

" ඒත් සර් හදිසි වෙලාවක කැනියුලා එකක් දාගන්න ගියාම ටෙන්‍ෂන් එකට හරියට වේන් (ශිරාවට) එකට දාගන්න අමාරු වෙනවා සර්. ජයසිකුරු එකේදිත් ඕක උනා" සාජන්වරයා මඳක් චකිතයෙන් කීවේය​. 

මම මොහොතක් කල්පනා කලෙමි. 

අයිසේ ඕක හරි ලේසිනේ. දැන් හෙට හෙලිකොප්ටර් එකට ගියාම ක්ලින්ටන් එයිනේ. එතකොට සර් එක්ස්කියුස් මී කියලා ක්ලින්ටන් ගේ වම් අත අරගෙන කැනියුලා එක දාන්න​. ඒ  එක්කම සේලයින් ඩ්‍රිප් එකකුත් දාන්න​. එතකොට වේන් එක හරි. හදිසියේ මොනවා හරි මෙඩිකල් ඉමජන්සි එකක් උනොත් කිසිම ප්‍රශ්නයක් නෑ කැනියුලා එක තියනවා. එතනින් ඕන බෙහෙතක් දෙන්න පුලුවන්. 

මෙය ඇසූ සාජන්වරයාට සිනහ ගියේය​. 

" කමක් නෑ සර් හෙට බලමු. වෙන දෙයක් වෙච්චාවේ " මෙසේ කියමින් ඔහු යන්නට ගියේය​. 

මෙම සිදුවීමෙන් සති තුනකට පමණ පසුව මට මෙම සාජන්වරයා හමුවූ අතර  ඔහු පැවසූ පරිදි කිසිදු ගැළුවකින් තොරව ක්ලින්ටන් ගේ සුනාමි නිරීක්‍ෂණ චාරිකාව  නිම වී තිබේ. 

වෛද්‍ය රුවන් එම් ජයතුංග