චන්න ජයසුමන විසින් විද්‍යුත් චුම්භක තරංග තියරිය භාවිතා කරමින් අපායක් ඇතැයි පවසයි. මීට ඉහතදී චන්න ජයසුමන වකුගඩු රෝගයට හේතුව සොයා ගැනීමට නාථ දෙවියන් සහ භූතයන් උපකාර කල බව කීවේය. (මේ ක්‍රමයේ පරියේෂණ පිලිබඳව මම යෝක් විශ්ව විද්‍යාලයේ මගේ ගුරුවරයෙකු වූ පරියේෂණ මනෝවිද්‍යාඥ ඇල්ස්ටයාර් මැප්ට කිව්වා. මහාචාර්‍ය මැප් මොකුත් නොකියා මගේ දෙස ඇස් ලොකු කරගෙන බලාගෙන හිටියා).
චන්න ජයසුමන විද්‍යාත්මක පාරිභාෂික වචන යොදාගෙන එතරම් විද්‍යාත්මක දැණුමක් නොමැති ශ්‍රද්ධා අධික බොදු ගැලරිය පිනවීමක් ලෙස මේක දකින්න පුලුවන්. එසේම සාමාන්‍ය පෙලින් පසු විද්‍යාවන් ඉගන නොගත් කළා විශයන් හෝ ඒ ආශ්‍රිත විශයන් කල විශ්ව විද්‍යාල කථිකාචාර්‍යවරු පිරිසකුත් මේක බැක් කරනවා. (හේතුව ඔවුන්ට විද්‍යාත්මක චින්තන පදනමක් නොමැති වීම නිසා විය හැකියි).
විද්‍යුත් චුම්බක (EM) තරංග භාවිතයෙන් නිරයේ පැවැත්ම ඔප්පු කිරීම විද්‍යාත්මකව කළ නොහැකි බව ඕනම භෞතික විද්‍යාඥයෙක් දන්නවා.
විද්‍යුත් චුම්බක තරංග සම්පූර්ණයෙන්ම අයිති වන්නේ නිරීක්ෂණය කළ හැකි, භෞතික විශ්වයට . ඒවා භෞතික විද්‍යා නියමයන් මගින් පාලනය වන අතර, සංවේදක (sensors) භාවිතයෙන් මැනිය හැකි අතර, ආලෝකයේ වේගය (3 × 10⁸ m/s) වැනි ස්ථාවර සීමාවන් තුළ ක්‍රියාත්මක වෙනවා. ඊට වෙනස්ව, නිරය යනු භෞතික ලෝකයෙන් බාහිරව පවතින දේවධර්මීය, අධිභෞතික හෝ ආධ්‍යාත්මික සංකල්පයක්. භෞතික නොවන ක්ෂේත්‍රයක් ඔප්පු කිරීමට භෞතික විද්‍යුත් චුම්බක තරංග භාවිතා කිරීමට උත්සාහ කිරීම දාර්ශනිකයන් හඳුන්වන්නේ "ප්‍රභේද දෝෂයක්" (category error) ලෙසයි—එය හරියට සිතුවිල්ලක බර මැනීමට හෝ අංකයක වර්ණය සෙවීමට උත්සාහ කිරීමක් වගෙයි.
ප්‍රඥාව අඩු ශ්‍රද්ධාව වැඩි ගෘප් එකක් මේ වගේ හිතලුවක් කියලා තෙත් කරන්න පුලුවන්. ඒ වගේම මේ මතය අභියෝග කරන පිරිසට මේ ගෘප් සාමාජිකයන් දම්මවලා කුනුහරපයෙන් බන්නවන්නත් පුලුවන්.
ජයසුමනගේ ලිපියේ මේ කොටස බලන්න (......පින්-පව්, කුසල්-අකුසල්, සසර-නිවන, නාම-රූප විශ්වාස නොකරන එහෙත් බෞද්ධ වෙසින් පෙනී සිටින තක්කඩින්ට නේක රාජ්‍ය අනුග්‍රහය ද ලැබෙන බව පෙනෙන්නට ඇති නිසා මේ වෙසෙසින්ම පරෙස්සම් විය යුතු කාලයකි.) මම මේක දකින්නේ ඔහු සුපුරුදු ලෙස Us vs Them සංකල්පය යොදාගෙන සමාජය බෙදන්න හදනවා ඔවුන් සහ අප කියලා. මේ සාවද්‍ය මතය අභියෝග කරන එකා නිරාගමිකයෙක් මේ මතය විශ්වාස කරන එකා ශ්‍රද්දාවන්ත බෞද්ධයෙක් කියලා. මම හිතන්නේ ඒක අන්තවාදී මෙන්ම කාලාම සූත්‍රය නොදන්න පුද්ගලයෙකුගේ ප්‍රකාශයක්.
(අපාය කියන සංකල්පය සහ ඒ හා බැඳුනු බිය / මානසිකත්වය නියර් ඩෙත් එක්ස්පීරියන්ස් එකකදී ක්‍රියාත්මක විය හැකි අයුරු පිලිබඳව මා විසින් ලිපියක් ලියා තියනවා. එය මෙතනින් කියවන්න Heaven, Hell and the Near-Death Experience LINK ; https://transyl2014.blogspot.com/2026/03/heaven-hell-and-near-death-experience.html
No comments:
Post a Comment
Appreciate your constructive and meaningful comments