Tuesday, October 4, 2022

ආර්ථිකමය වශයෙන් මෙන්ම ආකල්ප වශයෙන් ද ලංකාව දුගීය




අපගේ ලාංකික සමාජය සෑමකල්හිම ධනපතියන්ට වෛර කල සමාජයකි. මහන්සියෙන් ව්‍යාපාර කොට මුදල් උපයා තවත් සිය ගනනකට රැකියා ලබා දුන් පුද්ගලයා ලාංකික ප්‍රමිතීන්ට අනුව සූරාකන්නෙකි. අපගේ සමාජය සෑම විටම වන්දනා කලේ ධනයක් උත්පාදනය නොකරන, කර්මාන්ත කෙරෙහි අලස , ව්‍යාපාර කෙරෙහි අගතියෙන් බැලූ සමාජයට එලදායී දෙයක් ලබා නොදුන් එහෙත් විවේචනයේ දක්‍ෂ හිස් මිනිසුන්ටය. 

කොලඹ වරායේ වැඩවර්ජන සංවිධානය කොට කොලඹ වරායට ඒමට නියමිතව තිබූ බිස්නස් සිංගප්පූරු වරායට ලබා දුන් එන් .එම් පෙරේරා අපගේ සමාජයට ජාතික වීරයෙකි. කිසිවෙකුට රැකියාවක් නොදුන් ජීවිත බොහෝ ගනනක් නාය යාමට යොමු කල රෝහණ විජේවීර වන්දනීය නායකයෙකි.  

ආසියාවේ සිටි දක්‍ෂතම ව්‍යාපාරිකයෙකු වූ උපාලි විජේවර්ධන අපගේ සමාජයට හුදු ජාවාරම්කරුවෙකු විය. නවලෝක මුදලාලිලාගේ , මැලිබන් මුදලාලිලාගේ , සිද්ධාලේප මුදලාලිලාගේ ගේ ව්‍යාපාර දියුණු කිරීමේ හැකියාව අධ්‍යනය කරනවා වෙනුවට අපගේ මිනිසුන් උනන්දු වූයේ ඔවුන් ගේ දිළිඳු අතීතයේ ඇද කුද සෙවීමටය.  

අපගේ සමාජය ඉල්ලන්නේ වියාපාර ලෝකයේ ඉහලට නගින ධනය උත්පාදනය කරමින් ආර්ථිකයට උර දෙන ව්‍යාපාරිකයන් නොව අවස්ථාවාදී කපටීන්ට රැවටී බිලි බෝයිස්ලා වී ස්වයං විනාශයක් කරා ගිය ත්‍රීමා විතාණලා සහ වෙනුරලාය. එහෙත් උත්ප්‍රාසය නම් ව්‍යාපාර කර්මාන්ත ආදියේ යෙදෙමින් ධනය උපද්දවන පුද්ගලයන් සූරාකන්නන් , ධනපතියන් , ජාවාරම්කරුවන් කියමින් ඔවුන්ව විවේචනය කරන පා පැදියක් වත් ගැනීමට මුදල් නොතිබුනු , ඉරිසියාව සහ වයිරය සමාජයේ වපුරුවන පුස්සෝ දේශපාලනය හරහා හෝ ඩීල් හරහා හෝ මුදල් උපයා ගැනීමට තැත් කරති. මොවුන් අත්දැකීම් අඩු විචාර බුද්ධියෙන් හීන පරම්පරාවක්ම ග ්ඟ යවති.  

පෙරදා ධනපතියන් භංග වේවා කියමින් පන්ති කල පුද්ගලයා අද පාස්පෝට් දෙකක සහ රුපියල් මිලියන දෙදහසක හිමිකරුවෙකි. ඔහුගේ බස් බැරෑරුම් ලෙස ගත්තෝ අද කුණු කය නොමැති ගන්ධබ්බයන් ය. සමහරු ජීවත් වූවද දුප්පත්කමින් වෙළී තමන් ගේ අසාර්ථක වූ ජීවිත නිසා තමන් සමග මෙන්ම සමාජය කෙරෙහි වයිරයෙන් ජීවත් වෙමින් තමන්ට දේශපාලන පන්ති කල නායකයන් ජීවිතය සුවදායක ලෙස වින්දනය කරන අයුරු බලා සිටිති. එහෙත් මේ විශම චක්‍රයෙන් ශ්‍රී ලාංකික සමාජය මිදෙන්නේ නැත. මේ අනුව තවමත් පසුගාමී ආකල්ප කර තබාගෙන අවස්ථාවාදීන්ට සවන් දෙමින් සිටින ලාංකිකයාට ලබන සියවසේද තුන්වන ලෝකයේ හිඟන රටක් ලෙස ලෝකය ඉදිරියේ පෙනී සිටිය හැක.  






1 comment:

  1. එදා කන්ඩලම හෝටලයට එරෙහිව විරෝධය පා අද කණ්ඩලම හෝටලයෙන් උදේ, දවල්, රෑ තුන්වේලටම සප්පායම් වී දෙකක් දා ගන්නා මාදිලියේ පුද්ගලයන් වන මොවුන්ගේ නවතම බිල්ල වී ඇත්තේ ඩයනා ගමගේ සංචාරක රාජ්‍ය ඇමතිනිය බව පෙනේ

    ReplyDelete

Appreciate your constructive and meaningful comments

Find Us On Facebook