Tuesday, April 30, 2019

රිස්වාන්ට වතුර වක් කිරීම



අපගේ  වෛද්‍ය පීඨයේ ශ්‍රී ලාංකික සිසු සිසුවියන් 40 පමණ සිටියහ​. උත්සව දින වල අප එකට එක්වී කෑම සදාගෙන කා විනෝද වූයෙමු. මේ සඳහා එක් එක් සිසුවාට හාල් , මස් , අර්තාපල් , තෙල් , පළතුරු යුෂ යනාදී අයිතමයන් ගෙන ඒමට බෙදා තිබුනේය​. 

වරක් මෙවැනි සාදයක් සඳහා මට සූරියකාන්ත තෙල් ලීටර් 5 ගේමට නියම විය . එදින මම තෙල් මිලට ගැනීමට ගියද තෙල් කඩයේ තෙල් අවසන් වී තිබුනේය​. ඒ නිසා මම බටර් රාත්තල් 4 මිලදී ගෙන ඒවා උයන ස්ථාන (ගෑණු ළමයින් උයන රාජකාරී කළහ​) වලට භාර දුන්නෙමි.  

තෙල් වෙනුවට බටර් ගෙන ඒම පිලිබඳව රිස්වාන් මාව කෙල්ලන් ඉදිරියේ විවේචනය කල බව කොල්ලෙක් මට පණිවිඩයක් ගෙන ආවේය​. තවද කුමාර  වික්‍රමසිංහ  සබැඳිවද රිස්වාන් යම් විවේචනයක් කොට තිබූ නිසා කුමාරද සිටියේ පහන් සිතිනි.  

මේ සාදයෙන් දින තුනකට පමණ පසු රිස්වාන් අපගේ 4 නේවාසිකාගාරයට රාත්‍රියක ආවේය​. කුමාර සහ මම රිස්වාන්ට ගේමක් සෙට් කලෙමු. අපගේ නේවාසිකාගාරය මහල් 9 යුක්ත විය​. අප බාල්දියකට වතුර පුරවා 9 මහලේ බැල්කනියට වී සිටියෙමු. බැල්කනියෙන් පහළ කෙනින්ම ප්‍රධාන ද්වාරය තිබේ. රාත්‍රී 10 පමණ ඔත්තුකාරයා පැමින රිස්වාන් 6 මහලේ තිබූ නිල්මිණි විජේසූරියගේ උපන් දින සාදයට ඇවිත් ඇයට සුභ පතා දැන් යාමට සූදානමෙන් සිටින බව කීවේය​. මමත් කුමාර වික්‍රමසිංහත් වතුර බාල්දිය අල්ලාගෙන ප්‍රධාන ද්වාරයෙන් රිස්වාන් එලියට එන තෙක් බලා සිටියෙමු. 


අප ජීවත් වූ මහල් 9 කින් යුතු අංක 4 දරණ ශිෂ්‍ය නේවාසිකාගාරය 
( මේ චායාරූපයේ සිටින්නේ වෛද්‍ය අජිත් තෙන්නකෝන් ය )


රාත්‍රී 10. 15 පමණ ප්‍රධාන ද්වාරය ඇරුනේය​. නිල් පැහැති කබායකින් සහ කළු තොප්පියක් පැළඳ සිටි රිස්වාන්ව අප 9 වන මහලේ සිට දුටුවෙමු. ඒ සමගම කුමාර " මචං අන්න අරූ " කියා කීවේය​. ඒ සමගම අප වතුර බාල්දිය 9 මහලේ සිට පහලට හැලුවෙමු.  නයගරා ඇල්ල හිස උඩ කඩා වැටුනාක් මෙන් රිස්වාන් ගේ සියොලඟ තෙමී ගියේය​. ඒ සමගම අප බැල්කනියෙන් ඉවත්වී තම තමන් ගේ කාමර වලට ගියෙමු. බඩපුරා නාගත් රිස්වාන් තෙමිච්ච කුකුලෙකු සේ මීටර් 700 පමණ ඈතින් තිබූ ඔහු ජීවත් වූ 5 වන නේවාසිකාගාරයට ගියේය​.  

පසු කාලයක රිස්වාන් කොලොම්බියානු තරුණියක් සමහ විවහා වී කොලොම්බියාවට ගියේය​. කුමාර වික්‍රමසිංහ වර්තමානයේ කොළඹ ජාතික රෝහලේ  නියෝජ්‍ය අධ්‍යක්‍ෂ ජනරාල්වරයාය​. 

මේ කේස් එක සිදුවී වසර 29 ආසන්න කාලයක් ගතවී තිබේ. මේ සිදුවීම ගැන ලියන්නේ  ඒ කාලයේ මුස්ලිම් සිසුන් සහ අප  කිසිදු ජාති භේදයකින් තොරව එකිනෙකාට බාල්දි පෙරලාගත් ආකාරයයි. මේ බාල්දි කේස් මත මිස ජාතිවාදය මත පදනම්ව තිබුනේ නැත

වෛද්‍ය රුවන් එම් ජයතුංග

1 comment:

  1. රිස්වාන්ගේ බිරි මුස්ලිම් වුනාද?
    ළමයි මුස්ලිම්ද?

    ReplyDelete

Appreciate your constructive and meaningful comments

Find Us On Facebook