Saturday, October 31, 2015

පීතෘ භුමිය



හිරු රැසින් නැහැවුන මිටියාවත 
කඳු මුදුන් සිට ගලා හැලෙන දියඇලි
ගීත ගයමින් ගලා යන ගංගා 
සියොතුන් පියාඹන නිල් අහස 
වීය අප සැමගේම පොදු වස්තුවක් 

කිසිවෙකුට අයත් නොවූ භුමිය 
වීය සැමදෙනාටම රක්ෂා ස්ථානයක් 
සැමදෙනා සමගිව සිටියෙමු 
භුමියේ වැඩෙන ගස් වැල් ලෙස 

කාලයක් මෙලෙස ගිය විට 
ඇතැමෙකු භුක්තියට ගත්හ භුමියේ සරු ඉඩම් 
බෙදා වෙන්කර ගනිමින්
මගෙයි මගෙයි කියමින් 

භූමියට කුරිරු ලෙස වධ දී 
උපයාගත් රන්මසු වලින් 
මිලට ගත්තෝය වහලුන් 
කඹුරන්නට උන්ගේ ජීවිත යමින් බැඳ 

බෙදා වෙන්කරගත් භුමියේ 
පහල විය නීති රීති 
ගරු කල යුතුයි දේපලට 
අසල්වැසියාගේ 

නීතිය කැඩුවන්
කුදලාගෙන ගියහ නිරී සතුන් සේ 
සින්දෝය ඇතැමෙකුගේ අතපය
තියුනු අසිපත් වලින් 

අහසින් කඩා වැටුනෝය පැලැන්තියක් 
පූජකයන් කියාගත් 
පෙන්නා දෙව්ලොව අපට 
සින්දෝය උන් අපගේ සාක්කු 

කූඩැල්ලන් මෙන් ගිජුව 
සාරය උරාගත් භුමිය 
දෙවියන් විසින් අපටම තිලින කල
භූමියක් බව ඇතැමෙකු කීහ 

සමහරෙකු එය පීතෘ භුමිය ලෙස නම් කලෝය 
දිවි පුදා එය ආරක්ෂා කල යුතු බව මුර ගෑහ 
භුක්තිය ඇත්තේ අපට මිස අන් අයට නොවන බව 
තරයේ අවධාරණය කළහ 

පීතෘ භුමිය ආරක්ෂා කරනු 
ඔවුන් අපට විධාන කළහ 
බයිනේත්තු ඇමිණු තුවක්කු අතට ගෙන අප 
පීතෘ භුමියේ සතුරන් සොයා ගියෙමු 

මඩ වතුර පිරුණු අගල්වල 
අප සතුරන් දුටිමු 
ඔවුනටද කවා තුබුණි විස 
අපව දුටු තැන නසන්නට 

වෙන බසක් කතා කල 
වෙනත් නිල ඇඳුමක් ඇන්ද 
අප වැනිම මනුෂ්‍යන් කොටසකගේ ශරීර වලට 
ඇන්නෙමු බයිනේත්තු වලින් 
ඔවුන්ගේ ප්‍රාණය නිරුද්ධ වන තෙක් 

දසත ගලා ගිය 
මිනිස් රුධිරය 
එක්විය ගංගා වලට 
එකෙහින්ම නිල් ජලය රත් පැහැ විය 
දේව ශාපයක් සේ 

කාලතුවක්කු දුමාරයෙන් පිරී ගිය අහස 
ඇද වැටුණු මහා වෘක්ෂ 
නිසලවූ මිනිස් සිරුරු වැතිරුණු භූමිය
මිනිස් විෂ එකතු වුනු ගංගා 
මැව්වේ අමු සොහොනක දසුන්ය 

කුමක් වී ද ඒ රම්‍ය භූමියට 
මිනිස් ගිජු බවේ සාපය වැදුණු 
දියඇලි සිඳුනි මැලවුනි ගස්වැල් 
හැර ගියහ සියොතුන් ශාපලත් භුමිය 

අවසානයේදී සිදුවූයේ කුමක්ද 
කිසිවෙකු නැත දැන සිටියේ 
කියා දෙන්නට අවසන් ජවනිකාවේ රඟ 
නොවීය පනැති කිසිවෙකූ එම භුමියේ 

වෛද්‍ය රුවන් එම් ජයතුංග 

13 comments:

  1. Nice. This is the simple truth.

    ReplyDelete
  2. Siyalla awasanaye waharunu bumiya pamanak yalith thaniwewi.. hmmm...

    ReplyDelete
  3. යුද්ධයේ අවසන් දවස් මතක්වුනා. සමහර දේවල් දැක්කම හිතුනේ ඇත්තටම අපි දිනුවද කියන හැඟීම.

    ReplyDelete
    Replies
    1. යුද්දයේ අවසන් ජවනිකාව දකින්නේ මළවුන්‍ ය - ප්ලේ් ්ටා්

      Delete
  4. අවසානයේ ඉතිරි වන්නේ කකිරීම පමණද?

    ReplyDelete
  5. For all humans to be united forgetting the differences there has to be either a zombie apocalypse or alien attack.

    ReplyDelete

Appreciate your constructive and meaningful comments

Find Us On Facebook