එංගලන්තයේ සුද්දියෙකුට පෙම් කලෙමි

මුලින්ම එංගලන්තයට යන විට මගේ වයස අවුරුදු විසි එකකි. එවකට අවුරුදු විසි එකක නාඹර තරුණයෙකු වූ මම සාජන්ට් නල්ලතම්බි මෙන් ආදරයට කෝඩුකාරයෙකු ( කෝටු කෑලි ?) වූයෙමි. එවැනි තත්වයක් යටතේ ලන්ඩනයේදී මට ලොරේන් හමු වේ. ලොරේන් අවුරුදු විස්සක අයිරීෂ් ජාතික තරුණියකි. එම නිසා ඇයගේ අයිරීෂ් උරුවට  කතා කරන ඉංග්‍රීසි වලට හුරු වීමට මට දින කීපයක් ගත විය​. 

ආදරය කරන්නේ එම් ජී ආර් මෙන්ද ගාමිනී ෆොන්සේකාසේ ද නැතහොත් ජෝන් ට්‍රැවොල්ටා වාගේද කියා හරි හැටි තේරුම් බේරුම් කර ගැනීමට බැරි වූ මා ලොරේන් ඉදිරියේ මුහුණ දුන්නේ අමුතුම හෙයියම්මාරුවකටය​. කෙසේ නමුත් සුදු තරුණිය ඉදිරියේ ගමයෙකු නොවී ලන්ඩන් ජෝන් සේ රඟපෑමට මට සිදු විය​. 

ඒ කාලයේ ජෝජ් මයිකල් , බෘස් ස්ප්‍රිංස්ටීන් , ෆිල් කොලින්ස් , යනාදී ගායකයන් ගේ ගීත ජනප්‍රියව තිබූ යුගයකි. අප පොප් සංගීතය ගැන කතා කලෙමු. අතිනත අල්ලාගෙන බ්‍රික්ස්ටන්, ඔක්ස්ෆඩ් ස්ට්‍රීට් , වෝල්තෙම්ස්ටෝ සෙන්ට්‍රල් මාවත්හි සැරිසැරුවෙමු. හයිඩ් පාක් එකේ ඇවිද්දෙමු. බඩගිනි වූ විට ලාබෙට මිල්දී ගත හැකි ෆිශ් ඇන්ඩ් චිප්ස් හෝ හැම් බර්ගර් ගිල දැමුවෙමු.එක් දින පාස් දෙකක්  මිලට ගෙන  ඩබල් ඩෙකර් බස් වල උඩ තට්ටුවේ  ගමනාන්තය වෙන තෙක් ගියෙමු. අප දෙදෙනා වැඩි වශයෙන් කතා කලේ පොප් සංගීතය ගැනය​. 

ඔක්ස්ෆඩ් ස්ට්‍රීට් හෙවත් ඔක්ස්ෆර්ඩ් වීථිය ගැන කතා කිරීමේදී මට සංගීත කඩ මතක් වේ. ඒ කාලයේ සී.ඩී නොතිබුනේය​. තිබුනේ කැසට් සහ තැටි හෙවත් රෙකෝඩ්ස්‍ ය​. රෙකෝඩ්ස්‍ වල මිල අඩුය​. වරක් අප ඔක්ස්ෆර්ඩ් වීථියේ විශාල  සංගීත සාප්පුවක​ට ගියෙමු. පොප් ඉතිහාසය පටන් ගත්දා සිට ඊයේ දිනයේ ටොප් ඔෆ් ද පොප්ස් චාට්ස් වලට පැමිණි සෑම ගීතයක්ම  එහි තිබුනේය​. ඕනෑම ගායෙකයෙකුගේ/ ගායිකාවකගේ / සංගීත කණ්ඩායමක ගීත ඇල්බම් තිබුණි. එසේම එම ගීත වලට සවන් දීමට ඉතා විශිෂ්ඨ කොලිටියේ  සවුන්ඩ් සිස්ටම් එම සාප්පුවේ විය​. තමාට අවශ්‍ය ගීත ඇල්බමයට සවන් දී කැමති නම් එය මිලදී ගැනීමේ පහසුකම මෙම සාප්පුවේ තිබූ නිසා මම  හිතේ හැටියට එකල ලංකාවට පැමිනි තිබුනේ නැති ගීත ඇල්බම් ශ්‍රවණය කලෙමි. 

මම පින්ක් ෆ්ලොයිඩ් වෝල් ගීත ඇල්බමය විශිෂ්ඨ ශබ්ද කොලිටිය යටතේ ශ්‍රවණය කලෙමි. අප සාමාන්‍ය තත්ව යටතේ සවන් දෙන විට නොඇසෙන පසුබිම් සංගීතය එහිදී මට අැසුනේය​. එසේම ඒසී ඩීසී , ජෝජ් බෙන්සන් , ඇලිස් කූප , ඉයන් ගිලන් යනාදීන් ගේ නව ගීත මම නොමිලේ ශ්‍රවණය කලෙමි. අවසානයේදී ලොරේන් ඇයට තම ඥාතීන් හමු වීමට ඩොලිස් හිල් වෙත යාමට තිබෙන බව කීමෙන් මගේ සංගීත ලෝකයේ සවාරිය අවසන් විය​. 

බොහෝ වේලාවක් නොමිලේ සංගීතය ඇසූ නිසා එයට හිලව්වක් ලෙස මම එම සාප්පුවෙන් වයිට් ස්නේක් රොක් සංගීත කණ්ඩායමේ නවතම ඇල්බමයක් මිලදී ගත්තෙමි. ලොරේන් U 2 සංගීත කණ්ඩායමේ ඇල්බමයක් මිලදී ගත්තාය​. පසු කාලයක U 2 සංගීත කණ්ඩායම අයිරීෂ් ගරිල්ලන් සමග සබඳතා පවත්වන බවත් ඔවුන්ට මුදල් වලින් ආධාර කරන බවත් මම ඇසුවෙමි. නමුත් එදා අයිරීෂ් ජාතික ලොරේන් U 2 සංගීත කණ්ඩායමේ ඇල්බමයක් මිලදී  ගැනීම මට අමුත්තක් නොවූයේය​. 

කෙසේ නමුදු අප සංගීත සාප්පුවෙන් එලියට විත් මැක්ඩොනල්ඩ් අවන්හලකින් දිවා ආහාරය ගත්තෙමු. ඒ කාලයේ ලංකාවේ මැක්ඩොනල්ඩ් අවන්හල් නොවීය​. දිවා ආහාරයෙන් පසු අප ටියුබ් ස්ටේ‍ෂම වෙත ගියෙමු. ලොරේන් මට සමු දී ඩොලිස් හිල් කරා ගියාය​. මම වෝල්තෙම්ස්ටෝ සෙන්ට්‍රල් වෙත ගියෙමි.

මෙලෙස ටික කාලයක් පුරා දිව ගිය මගේත් ලොරේන්ගේත් පෙම් කතාව අවසානයේදී ස්වභාවික මරණයකට ලක් විය​.  එම නිසා අප දෙදෙනා විරහා වේදනාවෙන් කවි ලිවේ නැත​. එය ජීවන අත්දැකීමක් වූයේය​. 

අපේ කාලයේ පිටරට යන තරුණයෙකුට වැඩිහිටියන් දුන් අවවාදයක් නම් පිටරට ගියාට සුද්දියෙක් කරේ එල්ලගෙන ලංකාවට එන්න එපා කියාය​. ලංකාවේ  තරුණයෙකු හා එංගලන්තයේ සුද්දියෙකු අතර ආදර සම්බන්ධයක් පිළිබඳ කතාවක් මා කියවූයේ ශ්‍රියා රත්නාකරගේ හම සුදු නිසා නවකතාව හරහාය. එහි අවසානය ඛේදාන්තයකි.  

එක්දහස් නවසිය හැත්තෑ ගනන් වල මගේ දුර ඥාතියෙකු වෛද්‍ය විද්‍යාව හැදෑරීම සඳහා  එංගලන්තයට ගොස් සුදු කාන්තාවක් විවහා කරගෙන ආවේය​. සිංහලකමට මුල් තැනක් දුන් ඔහුගේ පියා අධික කළකිරීමට පත් විය. ඔහුගේ මරණය සිදුවන්නේත් මේ කළකිරීම උඩය​. අද කාලයේ ඟාතීන් අතර මේ අනවශ්‍ය සිත් තැවීම් නොමැතිව ජාතීන් අතර අන්තර් විවහා සිදුවේ. එහෙත් ඒ කාලයේ මගේ යටි සිතේ මේ  කතන්දර තැත්පත්ව තිබෙන්නට ඇත​. එම නිසා එම ආලය ඉක්මනින් ස්වභාවික මරණයකට ලක් වූවා විය හැක​.