ජයවර්ධන පුරය

1982 දහය වසරේ අප සිටි ගොඩනැගිල්ලට කීවේ ජයවර්ධනපුරය කියාය​. ඒ අංශ භාර  ප්‍රධානියා ජයවර්ධන සර් වූ නිසාය​. මේ කලාපයෙ අපගේ පන්තිය වූ 10 එෆ් පන්තිය කළාපයේ එපාම කරපු පන්තිය ලෙස කුප්‍රකට විය​. මම , සකලසූරිය , ලාල් රූපතුංග , ඩබල් එන් පී රත්නායක​, සිදත් සුරේන්ද්‍ර , රජිත් හෙවත් මීයා, රණසිංහ , මොරේ , ලියනපතිරණ ඉතා ව්‍යාල සුසංයෝගයක් වූයේය​. මේ නාස්ත්‍යාත්මකතාවය කෙසේදයත් සමහර ගුරුවරියන් දහය එෆ් පන්තියට ඉගැන්වීමට ඒමට පවා බිය වූහ​. 

දහය වසරේදී මම , රත්නායක , සකලසූරිය​, ලියනපතිරණ සහ මිනී ඔළුවා පන්තියේ පිස්සු නටන නිසා ෆිසික්ස් ඉගැන්වූ අත්කොට හැට්ට ඇඳි ගුරුතුමිය අපගේ පන්තියට ඒම ප්‍රතික්ශේප කළාය​. අත්කොට හැට්ට ඇඳි ගුරුතුමිය බ්ලැක් බෝඩ් එකේ ධරය , භාරය ආයාසය කියා රූප සටහන් අඳින විට කොල්ලෝ ඇයගේ කිහිල්ල දෙස ඇසිපිය නොහෙලා බලා සිටිති. මේ නිසා පසුව ඇය බ්ලැක් බෝඩ් එකේ රූප සටහන් නොඇඳ ගුරු පුටුවේ වාඩිවී සටහන් කියවූවාය​. කෙසේ නමුත් 10 එෆ් පන්තියේ කොල්ලන් ගේ පිස්සු නැටීම නිසා ඇය පන්තියට ආවේ නැත​. 

බුද්ධාගම ඉගැන්වූ කොක්මාදූවේ ගුණසිරි හාමුදුරුවන්ටද මොවුන්  විකාර කතා කීමෙන් බාධා කලහ​. එම නිසා හාමුදුරුවන් ඉදිරි පේලි වල සිටි ඉගෙන ගැනීමට උනන්දුව දැක්වූ ළමුන්ට පමණක් ඇසෙන සේ පාඩම කරගෙන ගිය අතර ටික වෙලාවක් යන විට මොවුන් ද හාමුදුරුවන් අසලට විත් ඉතා උනන්දුවෙන් පාඩමට සවන් දෙන්නාක් මෙන්  නෙත් අයාගෙන සිටියහ​.    වරක් බුද්ධාගම පීරියඩ් එකකදී ඈතින් අපගේ පන්තියෙ වෙත වඩින කොක්මාදූවේ ගුණසිරි හාමුදුරුවන්  දුටු රත්නායක සහ ගැන්සිය එක වරම හයියෙන් ගෙල වට බැන්දා  වූ මුතු පොටේ ගීතය ගැයුවෝය​. පන්තියේ අනෙකුත් ළමෝද ගැයීමට හවුල් වූ අතර පන්තියේ ගෝසාව නිසා හාමුදුරුවන් ආපසු හැරී ගුරු විවේකාගාරයට වැඩි සේක​. අප අහම්බෙන් මෙන් ලැබුනු  ෆ්‍රී පීරියඩ් එකේ ගීත ගයමින් විනෝද වූයෙමු. මේ විනෝදය කැඩී ගියේ අල්ලපු පන්තියක උගන්වමින් සිටි නිලවීර මයා වේවැල සමග කඩා වැදීම නිසාය​.

අපගේ පන්තිය තිබුනේ තෙවන මහලේ පාර අද්දරට වන්නය. ​එම පන්තියේ කොරිඩෝවට ගිය විට කිත්‍යාකාර පාරේ තිබෙන පාසල් ගේට්ටුව පෙනේ. පන්තියේ ජනෙල් විශාලය​. ජනෙල් විවෘත වන්නේ තාර පාරටය​. ඉන් එහා විද්‍යාලීය ක්‍රීඩා පිටියටයි. 

දිනක් ගමනායක වෙරළු තොගයක් පන්තියට ගෙනාවේය​. රත්නායක ඇතුළු කණ්ඩායම වෙරළු කා ඇට වලින් කොල්ලන්ට ගැසූහ​. වැඩියෙන්ම ගැසුවේ කොකටුවාටය. හිසට වැදෙන වෙරළු ඇට නිසා කොකටුවා කුඩයක් ඉහලාගෙන සිටියේය​. මෙය දුටු සකලසූරිය කොල්ලෙක් ගේ පොත් බෑග් එකක් කුඩය ඉහලාගෙන සිටි කොකටුවා ගේ හිස මතට යැවීය​. කුඩයද කඩාගෙන පොත් බෑග් එක කොකටුවා ගේ හිස මත වැටුණි. කොකටුවා ජයවර්ධන සර් ගේ කාර්‍යාලයට ගොස් පැමිණිලි කරන බවට තර්ජනය කොට නැගිට්ටා පමණි ඩබල් එන් පී ඔහුව බදා ගත්තේය​. ඉන් ටික වේලාවකට පසුව සෞඛ්‍යය පාඩම සඳහා ජයමහ සර් ආවෙන් කොකටුවා සන්සුන්ව වාඩි විය​. ඔහුට කොල්ලන් කොකටුවා කීවේ ඔහුගේ නාසය කොකටුවෙකුගේ මෙන් වක් වී තිබීම නිසාය.

අපගේ පන්තියේ  යම් අයෙකු පොතක් පතක් කියවන විට අහිංසක ළමයෙකුගේ පොත් බෑගයක් උදුරාගෙන පොත කියවන සිසුවාගේ හිස මතට පොත් බෑගය එවීම මේ පන්තියේ කොල්ලන් අතර තිබූ පුරුද්දක් විය​. මගේ හිසටද පොත් බෑග් කීපයක් වැටුනු නිසා මම සිටියේද රිටන් එක දීමටය​. 

වරක් මම හිස පහත් කරගෙන චිත්‍ර කතා පත්තරයක් බලමින් සිටි සකලසූරියගේ හිස මතට  කොකටුවාගේ පොත් බෑගය විසි කලෙමි. මින් උරණ වූ සකලසූරිය කොකටුවාගේ පොත් බෑගය ජනේලය හරහා තෙමහල් ගොඩනැගිල්ලෙන් බිමට විසි කලේය​. තම පොත් බෑගය මහල් තුනක් ඉහලින් පියෑඹීම නිසා කොකටුවා විලාප දුන්නේය​. මගේ බත් එකත් තිබ්බා ඔහු නහයෙන් අඞන ගමන් කීවේය​. මම  වහ වහා පහළට දිව ගියෙමි. 

කොකටුවාගේ පොත් මල්ල  තාර පාරේය​. ඒ අසල අමරබන්දු අයියා  කණයා හෙවත් ජයසූරිය  සර් සමග කතා කරමින් සිටියේය​.  ​ හිටි හැටියේ උඩින් පාත් වූ පොත් මල්ල දුටු ජයසූරිය  සර් මවිත විය​. 

" සර් මගේ බෑග් එක උඩ ඉඳන් වැටුණා "   එසේ කියමින් මම කොකටුවාගේ  බෑග් එක රැගෙන යලි පන්තියට දිව්වේ ජයසූරිය  සර් ගෙන් සිතාසියක් ඒමට පෙරය​. 

අපගේ පන්තියේ ළමයි උදෑසන පන්සිල් ගන්න වේලාවට පන්සිල් නොගෙන කොරිඩෝවේ කෑකෝ ගසමින් සිටින බව කිත්‍යාකාර පාර ගේට්ටුවේ සිටි ශිෂ්‍ය නායකයන්ට පෙනුනි. මේ නිසා කිහිප වතාවක් උදෑසන පන්සිල් ගන්නා වේලාවට ජයවර්ධන සර් හිටි හැටියේ වේවැල රැගෙන අපගේ පන්ති නිරීක්‍ෂණයකද යෙදීමට පුරුදුව සිටියේය​. මීට අමතරව අමරබන්දු අයියාද අපගේ පන්තිය ගැන සෝදිසියෙන් සිටියේය​. 

වරක් පන්සිල් ගන්නා වේලාවේදී කොරිඩෝවට පැනගත්  රණසිංහ උස් හඞින් රෑන ගිරා ජෝඩුවයි කියා ගැයුවේය​. ඒ අතර වාරයේ ගේට්ටුව අසල සිටි ශිෂ්‍ය නායකයන් කීප දෙනෙක් රණසිංහ දෙස බලමින් ඔහුව හඳුනා ගැනීමේ උත්සහයක යෙදී සිටිනු මම දුටුවෙමි. 

" රනේ වැඩේ දෙල් අන්න ප්‍රිෆෙක්ස්ලා වගයක් මේ පැත්තට එනවා මම ඔහුට අණතුරු ඇඟවූයෙමි. 

රණසිංහ යළි පන්තියට ගොස් දොහොත් මුදුන් දී පන්සිල් ගත්තද ශිෂ්‍ය නායකයන් ඔහුව හඳුනාගෙන ජයවර්ධන සර් ලඟට ගෙන ගියහ​. එදා රණසිංහට ජයවර්ධන සර් ගෙන් බුරියානි ලැබුණි. 

ඊලාම් යුද්දයේදී සුවිශේෂ මෙහෙවරක් කල රණසිංහ වර්තමානයේ විශ්‍රාමික යුද හමුදා නිලධාරියෙකි. 

වෛද්‍ය රුවන් එම් ජයතුංග