Sunday, March 17, 2019

ජෝන් ඩෙන්වර් ; සංගීතය සහ ස්මරණය

 

අවාසනාවන්ත ගුවන් යානා අණතුරකින් ජෝන් ඩෙන්වර් මිය ගියේ නොමැති නම් ඔහු මේ වන විට තම ජීවිතයේ 70 සැතපුම් කණුව පසු කරන්නේය​. එහෙත් 1997 වසරේදී ඔහු මිය ගියේය​. 

ජෝන් ඩෙන්වර් ගේ ගීත අප අසන්නේ 1970 දශකයේ මුල් කාලයේ ශ්‍රී ලංකා ගුවන් විදුලි සංස්ථාවේ ඉංග්‍රීසි සේවය හරහාය​. 1978 වසරේදී වරක් මමත් ප්‍රියදර්ශන අබේවීර ගුණවර්ධනත් ජෝන් ඩෙන්වර් ගේ කන්ට්‍රි රෝඩ්ස් ගීතය පාසලේදී මේසය ඩ්‍රම් එකක් ලෙස වාදනය කරමින් ගායනා කලෙමු. පසු කාලයක ශ්‍රී ලංකා ගුවන් හමුදාවට බැඳුනු ප්‍රියදර්ශන අබේවීර ගුණවර්ධන ඊලම් යුද්ධයේදී තම ගුවන් යානාව කඩා වැටීම නිසා මිය ගියේය​. 

1985 වසරේ මමත් රාජකීය විද්‍යාලයේ තුසිතත් ඔහුගේ නිවසේදී  ( තුසිත පදිංචිව සිටියේ බම්බලපිටිය හංදිය ආසන්නයේ නිවසකය​) අප දෙදෙනා සේනාරත්න සර් ගේ භෞතික විද්‍යාව ටියුට් වල ගනං හදන්නේ ජෝන් ඩෙන්වර් ගේ සිංදු වලට සවන් දෙමිනි. තුසිත වර්තමානයේ එක්සත් රාජධානියේ ජීවත් වෙයි. 

1987 වසර එලැඹෙන විට මමත් ධම්මික රත්නායකත් යූක්‍රයීනයේ විනිට්සා වෛද්‍ය පීඨයේදී ජෝන් ඩෙන්වර් ගේ කන්ට්‍රි රෝඩ්ස් ගීතය ගායනා කල අතර ධම්මික රත්නායක ගිටාරය වැයීය​. 

2012 වසරේදී මා විසින් ලියූ මානසික රෝගියාගේ පරිකල්පනය ( මෙම පොත 2013 රාජ්‍ය සාහිත්‍ය සම්මාන ප්‍රදානය සඳහා සමීක්‍ෂණයට තෝරා ගනු ලැබුණි) මානසික රෝගියාගේ පරිකල්පනය පොතේ එන මනංකල්පිත චරිතයක් වන වින්සන්ට් ලංකාතිලක  සවුත් ඩැකෝඩාවලදී ඇමරිකානු යුවලක් ඉදිරියේදී ජෝන් ඩෙන්වර් ගේ ඇනීස් සෝං ගීතය ගායනා කරයි . 

......අපි හතු හැඩයට හදලා තිබ්බ ලී ආසනවල වාඩිවෙලා හැවිනා එක්ක ස්පාඤ්ඤ වයින් බෝතලයක් බිව්වා. ශීතත් උෂ්ණත් නැති සනීප හුළඟ. සූරියකාන්ත මල්. කිලෝ මීටර් දෙකක් විතර දිග ලී කණුවලින් තැනූ වැට. පිකප් රථය. මම ඩේව් දිහා බැළුවා. තෘප්තිමත් ගොවියෙක්. මට වප් මඟුල මතක් වුණා. පුන්චිරලා මාමගේ හකු ඇට පැදුණු මුහුණ.  කෙරන් අපිට ඉතාලි ක‍්‍රමයට හදාපු මාළු පිඟානක් ගෙනාවා. කෙරන් ගේ රන් පැහැති කොණ්ඩය. මට බණ්ඩරී නැන්දාගේ අව්වට කරවෙච්ච මුහුණ මතක් වුණා. අපි ගිනිමැලය වටේ  එකතුවෙලා සින්දු කිව්වා. ඩේව් ගිටාර් එක වයමින් ඩොන් විලියම්ස්ගේ සින්දුවක් කිව්වා. කෙරන් තාලය ඇල්ලූවා. මම ඔවුන්ට ජෝන් ඩෙන්වර්ගේ ඇනීස් සෝං ගීතය තිළිණ කළා. විදේශීය උරුවකින් කියන ඇනීස් සෝං ඔවුන්ව කුල්මත් කරන්න ඇති. (මානසික ‍රෝගියා‍ගේ පරිකල්පනය- ගොඩගේ ප්‍රකාශකයෝ)

2018 වසරේදී බෆලෝ සිට නිව්‍ යෝක් දක්වා රිය ධාවනය කරන විට ගමන් වෙහෙස සහ කාන්සිය මම නිවා ගත්තේ ජෝන් ඩෙන්වර් ගේ ගීත වලට සවන් දෙමිනි. ඔහුගේ  ලීවිං ඔන් එ ජෙට් ප්ලේන් සහ සන් ෂයින් යන ගීත මම බොහෝ වාරයක් වාදනය කලෙමි.

ජෝන් ඩෙන්වර් වියට්නාම් යුද්ධයට එරෙහිව ගීත ගායනා කලේය​. එසේම පරිසර විනාශය ගැන ඔහු ජනතාව දැණුවත් කලේය​. ඔහු ජනතාවාදී ගායකයෙකු විය​. ජෝන් ඩෙන්වර්  මිය ගියද ඔහු අදත් ලෝකය පුරා මිලියන ගනනක් ජනතාව ගේ හදවත් වල ජීවත් වෙයි.  

වෛද්‍ය රුවන්  එම් ජයතුංග

4 comments:

  1. ඇත්ත.

    ඇනීස් සෝං විරහ ගීතයක් බව තේරුම් ගත්තෙ තුන්පාරක් විතර ඇහුවට පස්සෙ. ඒකෙ මාරම පරිසරාත්මක ගතියකුත් තියෙනව සංගීතයෙ.

    සන්ෂයින් අනික.

    තව එකක් තමයි ලීවින් ඔන් අ ජෙට්ප්ලේන්... මාර විදිහට හදවතට වදින ගිත...

    කන්‍ට්‍රි රෝඩ්ස් ඒ අතින් හරි සැහැල්ලුයි. බියර් එකක් තොලගාද්දි, ත්‍රී පීස් බෑන්ඩ් එකක් ගහනව ඇහෙනකොට දැනෙන හැඟීම මට දැනෙන්නෙ...

    භාරතයට මොහොමඩ් රාෆි වගේ, රොකී කඳුකරයට ජෝන් ඩෙන්වර් ගැළපෙනව...

    ReplyDelete
  2. "You fill up my senses.." කොච්චර ඇහුවත් එපා වෙන්නැති ගීතයක්...

    ReplyDelete
  3. Thanks Ruwan for reminding of these beautiful songs. Listening right now.

    ReplyDelete
  4. /අප දෙදෙනා සේනාරත්න සර් ගේ භෞතික විද්‍යාව ටියුට් වල ගනං හදන්නේ.../

    අසූවෙ අවුරුද්දෙ සේනාරත්න සර්ගෙ අශෝකාරාමෙ තිබ්බ පංතියට මම මුලින්ම ගියා.පස්සෙ සුභද්‍රාරාමෙ එකටත් ගියා...

    ReplyDelete

Appreciate your constructive and meaningful comments

Find Us On Facebook