අල්ලස් නොහොත් පගා

 

 

වෛද්‍යවරු අතර අල්ලස් ගැනීම ඉතා අවම බව මම විශ්වාස කරමි.  එහෙත් මීට කලකට ඉහතදී අල්ලස් ගත් වෛද්‍යවරු ගැන වාර්තා වී තිබුනි. ගාමිනී ෆොන්සේකාගේ සාගරයක් මැද චිත්‍රපටය පාදක වන්නේද 1970 දශකයේ අල්ලස් ගත් වෛද්‍යවරයෙකු වටාය​. තවද හෙන්රි ජයසේන ගේ හුණු වටයේ කතාව නාට්‍යයේ පගා ගසා අසුවූ වෛද්‍යවරු දෙදෙනෙක් ගැන සංවාදයක්ද තිබේ. 

ග්‍රාමීය රෝහලක ස්ථාන භාර වෛද්‍යවරයා ලෙස සේවය කල කාලය තුලදී රෝගීන් ගේ ඥාතීන් කිහිප දෙනෙකු මට අල්ලස් දී රෝගී සත්කාරය කරවා ගැනීමට ආවෝය​. මෙය මට හිසරදයක් වූ අතර මගේ කාර්‍යාලය අසල බිත්තියේ මෙලෙස පෝස්ටරයක් ගැසුවෙමි. ; මෙය රජයේ රෝහලකි. රෝහලේ සේවය කරන නිලධාරීන්ට අල්ලස් දීමට තැත් කිරීම නීති මගින් දඞුවම් ලැබිය හැකි වරදකි. එහෙත් මේ පෝස්ටරය එතරම් එලදායක නොවූයේය. ඉන් සති දෙකකට පමණ පසු එක් පුද්ගලයෙකු විසින් රෝහලේ නේවාසික ප්‍රතිකාර ලබන රෝගී කාන්තාවකට සේලයින් එකක් දෙන්නට කියා මට රුපියල් සීයක් අල්ලස් ලෙස දීමට තැත් කලේය​. මින් උරණ වූ මා එම රුපියල් සියයේ නෝට්ටුව ඔහුට කැවීමට තැත් කලෙමි. එය නැවතුනේ බාහිර රෝගී අංශයේ සිටි ලයනල් සහ විජේරත්න බණ්ඩා විත් මේ පුද්ගලයා ඇදගෙන යාමෙනි. 

අල්ලස් දීමට තැත් කල පුද්ගලයාට නෝට්ටුව කැවීමට තැත් කිරීම ගැන අද මම එකඟ නොවෙමි. එය තරුණ කාලයේ තිබෙන ඩෝන්ට් කෙයාර් මානසිකත්වය නිසා සිදුවූවක් බව මම සිතමි.  පසුදින මෙම සිදුවීම  මම මා මිත්‍ර මිනිපේ නාගදීප ව්‍යාපෘති ඉංජීනේරු සිරිල් නානායක්කාර මහතාට කීවෙමි. රුපියල් සියයේ නෝට්ටුව අතින් අල්ලා අල්ලස් දීමට තැත් කල පුද්ගලයාට කැවීමට තැත් කිරීම ගැන සිරිල් අයියා මට දොස් පැවරුවේය​.  නෝට්ටුව අතින් ඇල්ලීමෙන් මම අනවශ්‍ය අවදානමක් ගත් බවත් ඉදිරියේදී යමෙකු අල්ලස් දීමට තැත් කලහොත් අදාල පුද්ගලයාව පොලිසියට භාර දෙන ලෙසට ජීවිතය ගැන බොහෝ අත්දැකීම් තිබෙන සිරිල් අයියා මට කීවේය​. කෙසේ නමුත් අල්ලස් මුදල් කැවීමට තැත් කිරීම ගැන ගම පුරා පැතිරී ඉන්පසු කිසිවෙකු මට පගා දීමට ආවේ නැත​. 

මීගමුව රෝහලේදී බාහිර රෝගී අංශයේ සේවය කල සමයේදී දිනපතා පාහේ ඩ්‍රග් රෙප්ස්ලා හෙවත් ඖෂධ සමාගම් වල වෙළඳ නියෝජිතයන් පැමිණ අපට අළුත් බෙහෙත් සාම්පල් නොමිලේ දී ඒවා රෝගීන්ට නිර්දේශ කරන ලෙස ව්‍යංගයෙන් ඉල්ලති. සමහර විට මෙම වෙළඳ නියෝජිතයන් කරච්චලයක්ද වූයේය​. සමහරු පැමිණ පැය ගනන් අපට තම ඖෂධ වල ක්‍රියාකාරීත්වය ගැන දේශනා කරති. ඔවුන් මෙම දේශනා කටපාඩමින් කියූ අතර අතරින් පතර රසායණික ක්‍රියාකාරීත්වය ගැන පැණයක් අසා ඔවුන්ව දුර්මුඛ කිරීමට අප පුරුදුව සිටියෙමු. 

මා ඇතුළු වෛද්‍යවරු බොහෝ දෙනෙකු රෝගීන් ගේ පිටින් ගන්නා බෙහෙත් චිට් වලට යටින් එස්.පී.සී කියා ලියා ඖෂධ සංස්ථාවේ බෙහෙත් පමණක් නිර්දේශ කලෙමු. මෙය පසුව දැනගත් ඩ්ග් රෙප්ස්ලා අපව මග හරිමින් ඔවුන් ගේ බෙහෙත් ලියූ දොස්තරලාට වැකියුම් ක්ලීනර්ස් වැනි අරුමෝසම් ත්‍යාග දුන්හ​. 

ඖෂධ සමාගම් වල සමහර බෙහෙත් ඖෂධ සංස්ථාවේ බෙහෙත් වලට වඩා ප්‍රබල වූ බව සැබෑය​. ඖෂධ සංස්ථාව මගින් ගෙන්වන ඉන්දියාවේ නිපදවන ලද ඇමොක්සසිලින් කරල් වල පාන් පිටි පුරවා තිබූ බවටද රාවයක් තිබුනි. එග්සෙමා චර්ම රෝගය  සඳහා එක් ඖෂධ සමාගමක් විසින් නිපදවන ආලේපයක් ඉතා ගුණදායක විය​. එම නිසා අප එම බෙහෙත රෝගීන්ට නිර්දේශ කලෙමු. මෙම බෙහෙත නිර්දේශ කරන විට මමද ඕපීඩී වෛද්‍ය රුවාඩ් පෙරේරා මෙන් මෙය පුද්ගලික ඖෂධ සමාගමකින් නිපදවන එකක් බවත් අවශ්‍ය නම් භාවිතා කල හැකි බව දන්වා අපට මෙම පුද්ගලික ඖෂධ සමාගම සමග කිසි ගනුදෙනුවක් නැති බවද කීවෙමි. 

සමහර ඖෂධ සමාගම් වල වෙළඳ නියෝජිතයන් අප වැනි හාල් කෑලි මග හැර සමහර විශේෂඥ වෛද්‍යවරු වෙත ගොස් ඔවුන් ගේ ඖෂධ ප්‍රචාරණයට අාධාර ඉල්ලා සිටියහ. ​ඊට එඟතාව පළ කල එක් විශේෂඥ වෛද්‍යවරයෙකුට ඩ්‍රග් රෙප්ස්ලා කළ ගුණ සැලකුවේ ඔහුට මාලදිවයිනට දෙසතියක ට්‍රිප් එකක් දීමෙනි. 

ඖෂධ සමාගම් බූවල්ලන් වූවද සමහර විට ඔවුන් වෛද්‍ය කොන්ෆරන්ස් සඳහා තම දායකත්වය ලබා දෙති. ඒ කාලයේ මීගමුව බ්‍ර්වුන්ස් බීච් හෝටලයේ පැවති වෛද්‍ය සමුළු සඳහා දායකත්වය දෙන ලද්දේ එක් සුප්‍රකට ඖෂධ සමාගමක් විසිනි.  මේ නිසා මෙහි දෙපැත්තක්ද තිබේ. 

මීට වසර දහයකට පමණ පෙර දංකොටුව රෝහලේ එක් මධුලෝලී වෛද්‍යවරයෙකු සිටියේය​. ඔහු දක්‍ෂ රෝග නිර්ණය කරන්නෙකි. රෝගියෙකු ආ විට රෝගියාගේ රෝගය ටක්කෙට කියා ප්‍රතිකාරය සඳහා බෙහෙත් දීමට අරක්කු බෝතලයක් ගෙන එන ලෙස කියයි. බෝතලය ගෙනා පසු රෝගියාද පාවිච්චි කරන්නෙකු නම්  ඔහු සමග කාලක්‍රියා කොට නියමිත බෙහෙත ලියා දෙයි. මෙය අරුම පුදුම බෝතල් පගාවක් විය​. පසුකාලයක මධුලෝලීතාව නිසා ඔහු මිය ගියේය​. 

මා දැන සිටි එක් නාරි හා ප්‍රසව වෛද්‍ය විශේෂඥයෙකු ප්‍රසවය සඳහා එන ඉහල මධ්‍යම පාන්තික මවුවරුන් ගෙන් රුපියල් තිස් දහසක පමණ මුදලක් ලබා ගෙන ( මේ 1998 -99 කාලයේදීය​) රජයේ රෝහලේදී ඔවුන්ව සීසර් කිරීමට යොමුව සිටියේය​. 

එක් වරක් ඔහුට සීසර් ශල්‍යකර්මයට ඒමට නොහැකි වූ අතර ඔහු එය කිරීමට මට නියම කලේය​. මා විසින් නියමිත ලෙස සීසර් ශල්‍යකර්මය කොට දරුවා ගත් පසු ශල්‍යකර්මයට ලක් කල කාන්තාවගේ සැමියා නාරි හා ප්‍රසව වෛද්‍ය විශේෂඥයා විසින් තම බිරිඳ ශල්‍යකර්මයට ලක් නොකොට ඒ සඳහා මට භාර දීම ගැන ඔහුගේ අසතුට ප්‍රකාශ කොට මේ සඳහා අදාල නාරි හා ප්‍රසව වෛද්‍ය විශේෂඥයාට මීට සති කීපයකට ඉහතදී මුදල් දුන් බව කීවේය​. සැමියා විසින් කරන ලද මෙම චෝදනාව අසා මම නිරුත්තර වූයෙමි. 

වෛද්‍ය සේවය තුල මෙවැනි අක්‍රමිකතා තිබෙන බව නොරහසකි. එහෙත් 95 % වෛද්‍යවරු අල්ලස නොගෙන සේවය කරන බව මම විශ්වාස කරමි. බහුතරයක් වෛද්‍යවරු අල්ලස් නොගන්නා මට්ටමට පැමින සිටීම ඉතා හොඳ  දෙයකි. එය වෛද්‍ය සේවයේ ගුණාත්මක භාවය පෙන්වන්නකි. මේ නැඹුරුව එලෙසම පවත්වා ගෙන යාමට සෞඛ්‍ය බලධාරීන් සහයෝගය දිය යුතුය​. 

වෛද්‍ය රුවන් එම් ජයතුංග